Şəhid Sadiq Xubyar oğlu Azayev Quba rayonunun Qonaqkənd qəsəbəsində 11 avqust 1992-ci ildə dünyaya göz açıb.
Shimal.News xəbər verir ki, Aslan Aslanov adına orta məktəbdə təhsil aldıqdan sonra, 2010-cu ildə hərbi xidmətə yollanıb. O, 2016-cı ildən etibarən orduda gizir rütbəsi ilə xidmətə başlayıb.
Sadiq Azayev 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpası məqsədilə başlanan Vətən müharibəsi zamanı Füzulinin azadlığı uğrunda gedən döyüşlərdə iştirak edib. O, oktyabrın 2-də Füzuli döyüşləri zamanı şəhid olub.
Döyüş yoldaşlarının sözlərinə görə, Sadiq minamyotu səngərin içərisinə yerləşdirərək düşmənə atəş açan yeganə şəxs olub:
“Döyüş vaxtı bizi bir-birimizdən ayırdılar, aramızda 100 kilometr məsafə vardı. Deyirdi ki, qoymayın, əsgərlərə bir şey olsun”.
Şəhidin bacısı Mələk xanım deyib ki, Sadiq müharibə zamanı ailəsi ilə əlaqə saxlamayıb:
“Fikrimiz onda qalar, kövrələrik deyə bizimlə danışmayıb. Qardaşımın xidmət etdiyi postun yaxınlığındakı digər posta düşmən hücum edib, əsgərləri mühasirəyə salıb. O, təkbaşına mühasirəyə düşənlərin köməyinə gedib. Ona deyiblər ki, getmə, vəziyyət çox ağırdır, təkbaşına nə edə bilərsən? Amma o, dinləməyib. Nəticədə 20-dən çox əsgəri ölümdən xilas edib”.
Qeyd edək ki, Sadiq Azayev ölümündən sonra “Vətən uğrunda” , "Cəsur döyüşçü" , "Döyüşdə fərqlənməyə görə" , "Şuşanın azad olunmasına görə", "Xocavəndin azad olunmasına görə" və “Füzulinin azad olunmasına görə” medalları ilə təltif edilib.
