Yay mövsümünün başlaması ilə Şamaxının Avaxıl kəndi yerli turistlərin ən çox üz tutduğu məkanlardan birinə çevrilib.
Pirqulu qoruğu və Astrofizika Rəsədxanasının yaxınlığında, dəniz səviyyəsindən təxminən 1400 metr yüksəklikdə yerləşən Avaxıl kəndi sərin havası, sıx meşələri və təbii gözəlliyi ilə seçilir.
Araşdırmaya əsasən, kənddə turizm mövsümünün pik dövründə kirayə evlərin qiyməti gündəlik minimum 120-150 manatdan başlayır. Geniş və müasir üslubda tikilmiş 7-8 otaqlı villaların günlük icarə haqqı isə 400 manata qədər yüksəlir.
Bildirilir ki, bu tip villalar hovuz, optik internet, məişət texnikası, manqal zonası və digər müasir avadanlıqlarla təchiz olunub. Evlərin əksəriyyəti 12-15 nəfərin rahat yerləşə biləcəyi şəkildə layihələndirilib ki, bu da böyük ailələr və dost qrupları üçün əlverişli hesab olunur.
Məlumata görə, aylıq hesablandıqda belə villaların kirayə haqqı təxminən 15 min manata çata bilər. Mütəxəssislər yüksək qiymətləri həm təklif olunan şərait, həm də bölgəyə artan turist marağı ilə əlaqələndirirlər.
Mənbə: Metbuat.az
