Xaçmaz rayonunda məşqçi-müəllimlər və idmançıların məktəblilərlə görüşü keçirilib. ShimalNews bu haqda 2 mart tarixində Quba - Xaçmaz Regional Gənclər və İdman İdarəsinə istinadən xəbər verir.
Tədbir Mehrəliqışlaq kənd ümumi orta məktəbində təşkil olunub. Məktəbin direktoru Pənah Ələsgərov idmanın kütləviliyinin artırılması, idmançılarımızın beynəlxalq arenada qazandığı uğurlardan danışıb. Məktəbdə oxuyan şagirdlərin də bu müvəffəqiyyətləri təkrarlaya biləcəyini bildirib. O, məşqçi-müəllimlərlə məktəblilərin görüşünün gənclərdə idmana marağı artıracağını vurğulayıb.
Quba-Xaçmaz Regional Gənclər və İdman İdarəsinin Xaçmaz rayonu üzrə Gənclər və İdman Sektorunun müdiri Elman Məmmədov 2024-cü ildə Quba şəhərinin "İdman paytaxtı" seçilməsinin regionda idmanın inkişafına təkan verəcəyindən bəhs edib, məktəbliləri idman bölmələrinə yazılmağa təşviq edib.
MMA (Qarışıq Döyüş Sənəti) üzrə məşqçi-müəllim Süleyman Əliyev təmsil etdiyi idman növü və karyerası haqqında danışıb, idmanın uşaq, yeniyetmə və gənclərin fiziki və əqli inkişafında müstəsna rol oynadığını bildirib.
Çıxışlardan sonra məktəblilərin sualları cavablandırılıb, fikir mübadiləsi aparılıb.
