"Şahdağ Qusar" klubunun kapitanı Rahid Əmirquliyev II Liqanın XV turu çərçivəsində açıqlama verib. Bu barədə ShimalNews 8 mart tarixində “Report”a istinadən məlumat verir.
34 yaşlı yarımmüdafiəçi qış fasiləsindən sonra keçirilən ilk görüşü ("Baku Sportinq"lə) dəyərləndirib:
"Çempionatın liderinə qarşı oynayırdıq. Qələbə qazanıb, xal fərqini azaltmaq istəyirdik. Oyuna pis başlamamışdıq. İlk hissəni 1:0 hesabı ilə öndə başa vurduq. Ancaq ikinci hissədə qol buraxdıq və görüş heç-heçə nəticələndi. Əslində, pis nəticə deyil. Hər şey bununla bitmir. Qarşıda daha yaxşı nəticələr qazanacağıq".
Azərbaycan millisinin sabiq futbolçusu komandanın hədəflərindən danışıb:
"Məqsədimiz çempionluqdur. II Liqanın lideri ilə xal fərqi bir qədər çoxdur. Düşünürəm ki, bunu aradan qaldıracağıq. Bunun üçün gücümüz var. Sona qədər vuruşacağıq. Çempion olmaq istəyirik".
Daha sonra R.Əmirquliyev "Şahdar Qusar"ın hazırkı durumu barədə fikirlərini bölüşüb:
"Mənim nəsə deməyim düzgün olmaz. Bu barədə rəhbərlik daha dəqiq danışa bilər. Yaxşı komandamız var. Fasilədən sonra heyətə yeni oyunçular qoşulub. Onlar komandaya uyğunlaşmalıdırlar. Çempion olmaq üçün komandamızda hər şey var. Bunu meydanda göstərmək lazımdır".
Hazırda "Şahdağ Qusar" 15 tur keçirərək 31 xal toplayıb və 4-cü pillədə qərarlaşıb. Turnir cədvəlinə isə 38 xalla "Baku Sportinq" başçılıq edir.
