Qusar Olimpiya İdman Kompleksində kiçik yaş qrupu və yeniyetmələr arasında sambo üzrə açıq birincilik keçirilib. Bu barədə ShimalNews 20 dekabr tarixində məlumat verir.
Ümumilikdə 9 çəki dərəcəsində Bakı şəhərindən, Quba, Qusar, Xaçmaz və Şabran rayonlarından 80 nəfərə yaxın idmançı mübarizə aparıb. Qaliblər müvafiq dərəcəli diplom və medallarla təltif olunublar.
Yarış "Heydər Əliyev ili" çərçivəsində təşkil olunub. Açılış mərasimində Quba-Xaçmaz Regional Gənclər və İdman İdarəsinin əməkdaşları, Qusar rayonu üzrə gənclər və idman sektorunun müdiri Emil Əmirmətov, Azərbaycan Sambo Federasiyasının nümayəndəsi, yeniyetmələrdən ibarət Milli komandanın baş məşqçisi Yaqub Abdullayev, federasiyanın hakim heyəti, Qusar Olimpiya İdman Kompleksinin direktoru Elşən Məmmədov, idmançılar, müəllimlər və valideynlər iştirak ediblər.
Tədbirin keçirilməsində məqsəd regionda sambo idman növünün təbliğ və inkişaf etdirilməsidir.
