“Hypers Guba”dakı baş məşqçi dəyişikliyi gündəmdədir. Vüqar Nadirovun klubdan getməsi heç də birmənalı qarşılanmayıb. Xüsusən də Qubada. Bu mövzuda müəyyən söz-söhbət də gəzir.
Deyilənə görə, Nadirov klubdan maliyyə məsələsinə görə istefa verib. Guya 37 yaşlı çalışdırıcının istədiyi pul verilmədiyinə görə bu ayrılıq yaşanıb.
Deyilənlərin nə dərəcədə doğrudu olduğunu Vüqar Nadirov Football-plus.az-a açıqlayıb:
“Yox, pul məsələsi olsaydı, 1 ay işləyib çıxardım, yoxsa 2 il niyə orda işləyirdim?! Rəhbərliklə də heç bir problemim olmadı. Sonda qərar verdik ki, ayrılaq. Təbii ki, ayrılıq çox çətin idi. Komandanı sıfırdan qurmuşduq. Qurub 2-ci liqaya gətirdik. Kollektiv olaraq hamılıqla əziyyət çəkirdik. Hərə bir yerdə əmək sərf edib. Yəni rəhbərlik öz yerində, məşqçilər içəridə, dostlarım kənarda. Çalışdıq ki, komandanı 2-ci liqaya qaldıraq. Düzdü, çempion olmadıq. Amma Region Liqasından 2-ci liqaya qalxdıq. Ordan ayrılmaq çətin idi. Bir-birinə öyrəşmək var. Çox çətin işlər gördük. Qismət. Hər bir işdə xeyir var”.
