Vüqar Nadirovla yollarını ayıran “Hypers Guba”nın yeni baş məşqçi axtarışı uzun çəkməyib.
İdman.biz-in məlumatına görə, II Liqa təmsilçisi vakant postu Bəhram Şahquliyevə tapşırıb.
O, mövsümün sonunadək Quba komandasını çalışdıracaq. Qusarlı çalışdırıcının qarşısına I Liqaya vəsiqə uğrunda mübarizə aparmaq vəzifəsi qoyulub.
II Liqanın debütantı 9 tura 18 xal toplayıb. Mövsümün geridə qalan hissəsində 6 qələbə əldə edən və 3 dəfə məğlubiyyətlə üzləşən şimal komandası turnir cədvəlinin 4-cü pilləsində qərarlaşıb.
Bu çempionat Bəhram Şahquliyevə tanışdır. O, ötən mövsümün ikinci yarısınadək “Şahdağ Qusar”ın sükanı arxasında olub.
Yayda isə yenidən “Zirə”yə qayıdıb. Məşqçi “Hypers”dən təklif gələnə kimi akademiyada fəaliyyət göstərib.
