Ölkə çempionatının 2-ci liqasının 9-cu turunda “Hypers Quba” “Şəfa”nın qonağı oldu.
- “Şahdağ Qusar”dan sonra daha bir əsas rəqibinizi - “Şəfa”nı da üstələyə bilmədiniz. Problem nədən ibarətdir?
- Futbolçularımdan heç vaxt razı qalmamışam. Zədəli oyunçularımız həddən artıq çoxdur. Oyunçu kasadlığı var idi. Epizodları incələyəcəm. Onu deməliyəm ki, belə hakimlik olmur. Konkret hakim idarəçiliyindən şikayətçiyəm. Birtərəfli hakim olmur. Dərhal bilinirdi ki, hakim heyətinin meydan sahibi komandaya simpatiyası var. Hər şey göz qabağındadırv. Amma biz əziyyətlə bura kimi gəlib çıxmışıq. Bəzən məşq etməyə, yuyunmağa yerimiz olmurdu, ancaq Region Liqasından pillə-pillə gəlib bura qədər çatdıq. Yəni heç nəyi asan qazanmamışıq. Özüm də əziyyət qarşılığında nəyəsə nail olmağı xoşlayıram. Futbolda stress, belə şeylər olur. Lakin həmişə futbolçularımın yanındayam, yenə də olacam. Komandamız yaxşı futbol oynadı. "Şəfa"nı təbrik edirəm.
- Hansısa qərarlar istədiyiniz kimi olmadı, yoxsa ümumilikdə hakimlərin qərarlarından?
- Xırda-xırda yığıldı. Epizodlar bizim əleyhimizə gətirib çıxarırdı. Birinci qolda baxmalıyıq ki, onların hücumçusunun ayağı topa dəyib, ya yox. Amma hakimlərin işi son dərəcə bərbaddır. Gedib premyer-liqada hakimlik edə bilmirlər, burda şans verirlər, o da belə. Yaxşı, biz futbol oynamayaq? Futbol kişi oyunudur, xarakter oyunudur. Futbolumuzun inkişafını istəyiriksə, hakimlər belə səhvlərə yol verməməli, oyunu belə idarə etməməlidirlər. Tərəfkeşlik düzgün deyil.
- Əsas “qol silahınız” Cavid İmamverdiyevin məhsuldarlığı son vaxtlar aşağı düşüb...
- Elə bir şey deyil. Sabit futbolçu yoxdur. Mövsümdən-mövsümə dəyişir. Bir də görürsən yaxşıya, bir də görürsən belə... Cavid təcrübəli futbolçudu, peşəkar karyerası var. Həmişə komandaya kömək edir. Digər məqamlar, məsələn çəki amili burda rol oynayır. Yavaş-yavaş çalışırıq ki, artıq çəkini aradan qaldıraq. Cavid "Kür-Araz"da çox çəkiliydi. Amma bura gələndən görürsüz ki, çəkisini azaldıb. Pillə-pillə üzərində işləyirik. Çünki işləməyə çox vaxt lazımdır. Yəni üç ayın komandasıyıq. Bu klubu sıfırdan qurmuşuq. Bir il əvvəl Region Liqasında başlasaq da, heyətin hamısını dəyişdik. Fərqli çempionatlardır. Ona görə də yaxşı işlər görmək üçün bizə zaman lazımdır.
- Orxan Sadıqlını əsas oyunçu kimi transfer etmisizniz?
- Mən çalışdığım qədər kənarda qalan nə qədər peşəkar oyunçu varsa, komandama dəvət edirəm. Futboldan uzaqlaşmış futbolçuları meydana qaytarmağa çalışırıq. Yaxşı mənada "futbola ac" oyunçular axtarırıq. Maliyyə baxımından yox. Sadıqlı çox təcrübəlidir, bizə kömək edəcək. Premyer-liqada oynayıb. Həm xarakterinə, həm də oyununa görə düşünürəm ki, bizə köməyi deyəcək.
- Bəzən məşqçilər dost-tanışını da dəvət edir. Sizə kömək edəcək futbolçu yoldaşlarınız yoxdur, yoxsa özünüz istəmədiz?
- Məndə elə xarakter yoxdu. Kim güclüdüsə, onu da dəvət edirəm. Ən azı komandaya götürəndə də nizam-intizamına baxıram. Nizam-intizamı yoxdusa, güclü futbolçunu da komandaya götürmürəm.
- İstədiyiniz komandanı qura bilmisinizmi?
- Çalışdığım qədər yaxşı heyət qurmuşam. Dekabr fasiləsində 6-7 oyunçu dəvət edəcəyik. Yəni bunun üzərində işləyəcəyik. Hələ güclənməyə ehtiyacımız var.
- Hədəfiniz nədir?
- Komandamın yaxşı yerdə, pillədə qərarlaşması əsas hədəfimdir. Medal qazanmaq istəyirik. Görək qismət olacaqmı...
Mənbə: football-plus.az
