Azərbaycan Atletika Federasiyası (AAF) və “Zəfər Qaçış Klubu”nun İdarə Heyətinin birgə iclası keçirilib.
Shimal.News xəbər verir ki, iclas 21-22 dekabr tarixlərində ölkəmizin idman paytaxtı Quba şəhərində “Prezident Kuboku” uğrunda keçiriləcək kütləvi qaçış yarışına həsr olunub.
AAF katibi Məhərrəm Sultanzadə bildirib ki, ilin sonunda keçiriləcək bu kütləvi qaçış yarışı bölgələrdə idmanın bu növünə böyük maraq oyadacaq: “Qaçış marşrutunun şəhərin mərkəzi küçələrindən keçməsi sakinlərə və şəhərin qonaqlarına gərgin idman mübarizəsinin şahidi olmaq imkanı yaradacaq”.
“Zəfər Qaçış Klubu”nun direktoru Elşən Quliyev isə qeyd edib ki, yarış məsafəsi 42 km 195 m olacaq və beynəlxalq normalara görə tam marafon məsafəsini əhatə edəcək: “Bu məsafəyə yarış dünya şəhərlərinin bəzəyidir və çox populyardır. Tam marafon sayılan bu yarış müstəqilliyimiz bərpa olduqdan sonra Azərbaycanda ilk dəfə keçiriləcək Beynəlxalq Marafon yarışı olacaq”.
Yarışın təşkilindən irəli gələn məsələlər müzakirə edilib, Təşkilat Komitəsi yarışla bağlı məsələlərin sürətli həlli üçün müvafiq qurumlara müraciət ünvanlayıb.
