Sabiq məktəb direktoru 8 il 6 ay azadlıqdan məhrum edilib.
Şəki Ağır Cinayətlər Məhkəməsində mənimsəmə və rüşvət almaqda təqsirləndirilən Fəxrəddin Həsənovun cinayət işi üzrə hökm elan olunub.
Hakim Xaliq Məmmədovun sədrliyi ilə keçirilən prosesdə məhkəmə onu təqsirli bilərək 8 il 6 ay müddətinə azadlıqdan məhrum edib.
Həmçinin zərərçəkmiş şəxsə vurulmuş 31 min 535 manat maddi ziyanın təqsirləndirilən şəxsdən tutulması qərara alınıb.
Materiallarda bildirilir ki, o, 3 fevral 2020-ci ildən 5 iyul 2024-cü ilədək məktəbin direktoru vəzifəsində çalışıb.
İttihama görə, Ağsu rayonunun Rəhimli kənd orta məktəbinin sabiq direktoru vəzifə səlahiyyətlərindən istifadə edərək S.S.-dan hərbi rəhbər vəzifəsinə işə düzəltmək müqabilində 6 min 600 manat rüşvət alıb.
Bundan başqa, o, məktəb-liseyin inventarına aid 35 ədəd noutbuku götürərək geri qaytarmayıb. İstintaq həmin avadanlıqların mənimsənildiyini bildirib.
Təqsirləndirilən şəxs məhkəmədə ittihamları qəbul etməyib. O, pulu borc kimi aldığını, noutbuklardan isə cəmi 3 ədəd götürdüyünü iddia edib.
Mənbə: Pravdaz
