Qaxda qəssab dükanlarından oğurluq edən şəxs saxlanılıb.
Hadisələr şəhər ərazisində, İ. Dağıstanlı və A. Məmmədov küçələrində yerləşən ət mağazalarında qeydə alınıb.
64 yaşlı Qax şəhər sakini İlqar Rəşidov həmin ünvanlarda yerləşən qəssab dükanlarından ümumilikdə 36 kiloqram dana əti oğurlayıb. Hadisələrdən birində o, mağazanın qapısını açaraq içəri daxil olub, digərində isə qapını sındırıb.
Məlumata görə, İlqar Rəşidov A. Məmmədov küçəsində yerləşən eyni qəssab dükanına ikinci dəfə daxil olaraq 5-7 kiloqram ət oğurlamaq istəyib. Əti götürdükdən sonra mağazadan çıxarkən onu bir nəfər görüb. Bundan sonra əlindəki kisəni ataraq hadisə yerindən qaçıb.
Nəticədə tüfeyli həyat tərzi keçirdiyi bildirilən İlqar Rəşidov zərərçəkənlərə ümumilikdə 612 manat məbləğində ziyan vurub.
Zərərçəkən qəssabların şikayəti əsasında İlqar Rəşidov polis əməkdaşları tərəfindən saxlanılıb və barəsində cinayət işi başlanıb.
Təqsirləndirilən şəxs məhkəmədə ifadəsində törətdiyi əməlləri etiraf edib. Zərərçəkənlər isə onlara dəymiş ziyanın ödənildiyini və İlqar Rəşidovdan şikayət və tələblərinin olmadığını bildiriblər.
Məhkəmənin qərarı ilə İlqar Rəşidov 1 il 6 ay 22 gün müddətinə azadlığın məhdudlaşdırılması cəzasına məhkum edilib.
Mənbə: Lent.аz
