Ölkəmizin geniş oxucu kütləsinə çatmamış “Mir Cəfər Bağırovun məhkəməsi” adlı kitab DTX-nın (o vaxt Milli Təhlükəsizlik Nazirliyi) arxivində saxlanılan 2 cildlik material əsasında hazırlanıb.
Kitab sovet dövründə Azərbaycanın ən qəddar rəhbəri kimi tanınmış ziddiyyətli şəxsiyyət Mir Cəfər Bağırovun məhkəməsindən, Azərbaycan xalqının da bugünkü taleyindən dəhşətli izlərdən bəhs edir.
İstintaq materiallarından: əks-inqilabçı ünsürlərin məsuliyyətdən kənarlaşdırılması...
“Keçmiş Bakı neft milyonçusu Şəmsi Əsədullayevin oğlu, keçmiş milyonçu Zeynalabdin Tağıyevin kürəkəni, çar ordusunun poruçiki, fevral inqilabından sonra Bakıda “vəhşi diviziya” təşkil edən, 1918-ci ildə sovet ordusuna qarşı mübarizə aparan Əli Əsədullayev 1921-ci ilin dekabrında Gürcüstanda həbs olunub.
Beriyanın imzaladığı 15 dekabr 1921-ci il tarixli məktuba əsasən Əsədullayevi Azərbaycan FK tələb etdi. Ə.Əsədullayev Beriyanın imzaladığı 30 dekabr 1921-ci il orderlə həbsdən azad edilib, Bağırovun sərəncamına göndərildi. İş üzrə heç bir təhqiqat aparılmayıb. Sonralar Əli Əsədullayev Bakıda Cıdır meydanında işləyirmiş, sonralar arvadı ilə birlikdə İrana qaçıb.
Müttəhim Bağırov bu barədə istintaq zamanı bildirdi ki, Əsədullayevin nə üçün istintaqa cəlb olunmaması və həbs edilməməsindən xəbəri yoxdur. Şahidlər Əyyub Mikayıl oğlu Qasımov, Əliqulu Kür oğlu Mehdiyev göstərdilər ki, Bağırovun Əli Əsədullayevlə münasibətləri çox yaxın idi. Beləliklə, müəyyən olunub ki, Bağırov və onun əlaltıları sovet hakimiyyətinə və kommunist partiyasına sadiq kadrlara divan tutmaqla bərabər, fəal əks-inqilabçıları məsuliyyətdən uzaqlaşdırıb, onlara himayədarlıq ediblər...”
Mənbə: Moderator.az
