Bolşeviklər ləzgi xalqının qəhrəmanı, milli istiqlal hərəkatının fəal iştirakçısı, qusarlı Möhübəli əfəndi Kuzunvinin xalq arasındakı nüfuzundan qorxaraq, onu aradan götürmək üçün xüsusi plan hazırlayırlar.
Beləliklə, Fövqəladə Komissarlıq iki Kuzun kəndinin sakinlərini ələ alıb, onlara Möhübəli əfəndini qətlə yetirməyi əmr edir. 1922-ci ildə (digər mənbələrdə 1928) onların əlinə fürsət düşür. Bu zaman Xaçmazın Ağaşirinoba kəndində yaşayan molla Gülbala Möhübəli əfəndini qonaq çağırır. Möhübəli əfəndi kuzunlu dostu molla Məhəmmədlə birlikdə Ağaşirinobaya gəlir.
Burada bir nəfər Möhübəli əfəndiyə deyir ki, gəldiyi yolla qayıtmasın. Bunun səbəbi isə onun həmin adama qəsd hazırlandığını və bir neçə nəfərin pusquda durduğunu bilməsi idi. Lakin Möhübəli əfəndi inadkarlıq edib, belə deyir: “Bir can nədir ki, ondan ötrü düşmən qabağından qaçım”.
Möhübəli əfəndinin inadından əl çəkmədiyini görən Molla Məhəmməd dostunu ölümdən xilas etmək üçün məclisdən tez çıxıb onun ağ atına minir ki, bolşevik əlaltılarını çaşdırsın.
Lakin satqınlar həm Möhübəli əfəndiyə, həm dostu molla Məhəmmədə arxadan gizlicə atəş açırlar. Deyilənə görə, onlar yaralı olsalar belə, sürünərək uzun məsafəni keçiblər. Hər ikisi Qıraqlı kəndinə çatmamış vəfat edir.
Möhübəli əfəndi Kuzunvinin cəsədi yoxa çıxır. Bu günə kimi onun harada dəfn olunması haqda məlumat yoxdur.
Kuzunvi öldürüləndən sonra onun evi, var-dövləti talan olunur, bütün xatirələri məhv edilir, yazdığı kitabları isə çaya tökülür.
İstinad edilən mənbələr:
