23-cü Quba-Qusar batalyonu 1993-cü ilin noyabrında yaradılıb. O, 1992-ci ildə yaradılmış könüllülər rotasının əsasında Quba rayon prokuroru Əli Eyvazovun təşəbbüsü ilə təşkil olunmuşdur.
Batalyon Quba və Qusardan 490 nəfər könüllüdən ibarət idi. Sonra isə Zaqatala rotasından daha 100 nəfər onun tərkibinə qatılıb.
1993-cü ilin noyabrında batalyon cəbhəyə, Xocavənd istiqamətinə göndərilib və 704-cü briqadanın tərkibinə daxil olunub. Həmin ilin 27 dekabrında batalyon ilk dəfə Xocavənd istiqamətindəki döyüşdə iştirak edib. Bu döyüşdə batalyonun 7 əsgəri şəhid olub, 22 əsgəri yaralanıb. 1994-cü ilin mart ayında batalyon Fizuli istiqamətinə dislokasiya olunub.
Ümumilikdə, Birinci Qarabağ müharibəsində Quba-Qusar batalyonundan 48 nəfər şəhid olub, 7 nəfər itkin düşüb, 114 nəfər isə yaralanıb.
Quba-Qusar batalyonunun xərclərini rayon ictimaiyyəti öz üzərinə götürüb onlara ərzaq, paltar ə yanacaq cəbhəyə göndərirdi.
Batalyon 1994-cü ilin iyununda ləğv olundu. Heydər Əliyevin göstərişi ilə, hər il 27 dekabr günü, 23-cü Quba-Qusar batalyonunun yaranma günü kimi qeyd edilir.
2010-cu ildə Quba-Qusar batalyonunun döyüş yoluna həsr olunmuş “Bir batalyonun tarixi” adlı kitab çapdan çıxmışdır. Onun müəllifi, batalyonun komandiri olmuş Əli Eyvazovdur.
