27 sentyabr 2020-ci ildə cəbhəboyu zonada Azərbaycan Ordusunun mövqeləri Ermənistan silahlı qüvvələri tərəfindən intensiv atəşə tutulub. Nəticədə İkinci Qarabağ müharibəsi başladı, Azərbaycanda hərbi vəziyyət, komendant saatı və qismən səfərbərlik elan edildi.
Azərbaycan Ordusu 44 gün sürən hərbi əməliyyatlar nəticəsində Cəbrayıl, Füzuli, Zəngilan, Qubadlı, Şuşa şəhərlərini, işğal olunmuş rayonların 300-dən çox yaşayış məntəqəsini, həmçinin Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad etdi. 10 noyabr 2020-ci ildə Azərbaycan, Ermənistan və Rusiya arasında imzalanan bəyanatdan sonra 20 noyabr - Ağdam, 25 noyabr - Kəlbəcər, 1 dekabr isə Laçın rayonu qan tökülmədən geri qaytarıldı.
Vətən müharibəsi İlham Əliyev, Vladimir Putin və Nikol Paşinyan arasında 10 noyabr 2020-ci ildə üçtərəfli atəşkəs bəyanatı imzalanması ilə başa çatdı.
İkinci Qarabağ müharibəsi nəticəsində 2908 hərbi qulluqçu şəhid olub, 6 nəfər isə itkin düşüb.
