Sədaqət Qayınbəy qızı Kərimova 30 mart 1953-cü ildə Qusarda anadan olub.
Sədaqət Kərimova ilk təhsilini Qusar şəhər 1 saylı orta məktəbdə almışdır. Hələ 13 yaşında onun “Vətənim” adlı ilk şeiri, “Qırılmış qanad” adlı ilk hekayəsi və “Gənclər iməcilik keçirdilər” adlı ilk məqaləsi bir sıra qəzet və jurnallarda dərc edilmişdir. Kərimova onuncu sinifdə oxuyarkən “Azərbaycan gəncləri” qəzetinin respublika məktəbliləri arasında keçirdiyi “Anam, doğma Azərbaycan” mövzusunda inşa yazı müsabiqəsinin qalibi olmuşdur.
Sədaqət Kərimova 1969-cu ildə indiki Bakı Dövlət Universitetinin Jurnalistika fakültəsinə daxil olub. O, universitetdə oxuyarkən Azərbaycan Kommunist Partiyasının “Sovet kəndi” qəzetinə müxbir vəzifəsinə işə götürülmüşdür. Həmin qəzetdə o, 17 il çalışmışdır. 1997-ci ildən üç dildə çıxan “Samur” qəzetinin baş redaktorudur.
Sədaqət Kərimova bəstəkar kimi də tanınır. Onun özünə məxsus olan 100-dən çox mahnısı ayrı-ayrı müğənnilər tərəfindən ifa olunur. Onun rəhbərliyi ilə 40-a yaxın ləzgi xalq melodiyası yenidən işlənmiş və ya bərpa olunmuşdur.
Sədaqət Kərimova, həmçinin ssenari müəllifi və rejissor kimi fəaliyyət göstərib. O, 2020-2021-ci illərdə şəxsi vəsaiti ilə çəkilən “Soyuq günəş” adlı filmin müəllifidir.
1984-cü ildə o, Azərbaycan Jurnalistlər İttifaqının “Qızıl qələm” mükafatına, 1991-ci ildə Həsən bəy Zərdabi adına mükafata layiq görülmüşdür. 2006-cı ildə Sədaqət Kərimovaya “Azərbaycan Respublikasının Əməkdar mədəniyyət işçisi” fəxri adı verilmişdir. 2009-cu ildə o, Dağıstan Respublikasının “Şarvili” mükafatına layiq görülmüşdür. 2018-ci ildə “Doğma torpağa məhəbbətə görə” medalı ilə təltif olunmuşdur.
O, 1976-cı ildə yaratdığı “Suvar” Ləzgi Mahnı və Rəqs Ansamblına 20 il fasiləsiz rəhbərlik etmişdir.
Sədaqət Kərimova indiyə kimi nəşr olunmuş 30 kitabın müəllifidir. Onların sırasında “Soyuq günəş”, “Səssiz haray”, “Ləzginka çal, qardaşım”, “Hal”, “Qürub” və başqa kitablar var. Sədaqət Kərimova “Qusar, qusarlılar” adlı kitabını 2014-cü ildə çap etdirmişdir. Onun 2021-ci ildə “Гьиссерин кимел” (Hisslərimlə baş-başa) kitabı ləzgicə nəşr olunmuşdur.
İstinad edilən mənbələr:
