Bu gün şəhid Elxan Məmmədlinin doğum günüdür.
Elxan Ələkbər oğlu Məmmədli 1997-ci il oktyabrın 13-də İsmayıllı rayonunun Zoğallıq kəndində dünyaya göz açıb.
O, 2004-cü ildə Suraxanı rayonundakı Pərviz İsmayılov adına 278 saylı tam orta məktəbdə təhsil almağa başlayıb və 2015-ci ildə həmin məktəbin 11-ci sinfini bitirib. Daha sonra Bakı Biznes Universitetinin Dövlət və bələdiyyə idarəetməsi ixtisasına daxil olub və 2019-cu ildə ali təhsilini başa vurub. Subay olub.
Elxan Məmmədli 2019-cu ildə İsmayıllı Rayon Hərbi Komissarlığı tərəfindən müddətli həqiqi hərbi xidmətə çağırılıb. Dövlət Sərhəd Xidmətinin Tovuz rayonunda yerləşən N saylı hərbi hissəsində xidmət edib.
Hərbi xidmətdən tərxis olunduqdan sonra Azərbaycan Silahlı Qüvvələrinin Təlim və Tədris Mərkəzində "Ehtiyat zabit hazırlığı" kursu keçib. Kursu müvəffəqiyyətlə başa vuraraq leytenant hərbi rütbəsi alıb. Daha sonra Azərbaycan Respublikası Müdafiə Nazirliyinin Quru Qoşunlarında müddətdən artıq həqiqi hərbi xidmət hərbi qulluqçusu kimi fəaliyyətə başlayıb. Xocalı, Şuşa, Xankəndi və Qubadlının ətraf ərazilərində hərbi xidmətini davam etdirib.
Hərbi xidmət zamanı əldə etdiyi nailiyyətlərə görə 10 fevral 2022-ci ildə komandanlıq tərəfindən fəxri fərmanla təltif olunub.
O, 15 may – 29 iyul 2023-cü il tarixlərində "Komando" Dağ Təlimi Mərkəzində keçirilən 17-ci qəbul üzrə "Komando başlanğıc kursu"nu müvəffəqiyyətlə başa vurub və mərkəzin komandanlığı tərəfindən sertifikatla təltif edilib.
Elxan Məmmədli komando əməliyyat qrupunda kəşfiyyat komandiri vəzifəsində xidmət edib.
Leytenant Elxan Məmmədli 2023-cü il sentyabrın 19-da Qarabağda başlayan lokal xarakterli antiterror tədbirləri zamanı kəşfiyyat komandiri kimi döyüşlərə qatılıb. Həmin gün Xocavənd rayonunun azadlığı uğrunda gedən döyüşlərdə qəhrəmancasına şəhid olub.
Elxan Məmmədli 2023-cü il sentyabrın 21-də İsmayıllı rayonunun Zoğallıq kənd qəbiristanlığında dəfn edilib.
O, ölümündən sonra "Vətən uğrunda" medalı və 3-cü dərəcəli "Vətənə xidmətə görə" ordeni ilə təltif olunub.
