Ukraynadan daha 30 uşaq sosial-psixoloji reabilitasiya xidmətlərindən yararlanmaq üçün Azərbaycana gətirilib.
Shimal.News xəbər verir ki, uşaqlar Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşəbbüsü ilə ölkəmizə gətirilib.
Onların Qəbələ Uşaq Reabilitasiya Mərkəzində 10 gün ərzində tibbi və sosial-psixoloji dəstəklə təmin olunması nəzərdə tutulur.
Proqramın məqsədi uşaqların psixoloji vəziyyətinin yaxşılaşdırılması, sosiallaşması və asudə vaxtlarının səmərəli təşkilidir. Bu müddətdə fərdi psixoloji konsultasiyalar, qrup terapiyaları, yoqa və rəqs terapiyası məşğələləri keçiriləcək. Uşaqlar, həmçinin müalicəvi masaj, hovuz və vannadan istifadə, art-terapiya və digər reabilitasiya xidmətlərindən faydalanacaqlar.
Proqram çərçivəsində uşaqların Qəbələ ilə yanaşı, Şəki və Şamaxının tarixi və görməli yerlərinə ekskursiyalarının təşkili də planlaşdırılır.
Qeyd edək ki, ötən dövrdə Ukraynadan 700-dən çox uşaq və gənc Azərbaycana gətirilərək sosial-psixoloji reabilitasiya xidmətləri ilə təmin olunub.
