Ağsu şəhərində evlərdən oğurluq edən şəxs həbs olunub.
35 yaşlı Oruc Şikarov (şərti adla) müxtəlif vaxtlarda gecə saatlarında oğurluq etmək üçün əlverişli şərait axtarıb. O, iki evdə heç kimin olmadığını müəyyənləşdirdikdən sonra qanunsuz olaraq evlərə daxil olub və oradan müxtəlif əşyalar oğurlayıb.
O, ilk evdən zərərçəkənin anasına hədiyyə aldığı, dəyəri 200 manat olan paltonu götürüb. Digər evdən isə qadın ayaqqabıları, alt paltarları, donlar, uşaq geyimləri, masa örtükləri, yataq dəstləri və mətbəx əşyaları oğurlayıb. Nəticədə ev sahibinə ümumilikdə 880 manat məbləğində ziyan dəyib.
Faktla bağlı cinayət işi başlanıb və Oruc Şikarov saxlanılıb.
Təqsirləndirilən şəxs ifadəsində əvvəllər də oğurluğa görə həbs edildiyini, lakin amnistiya aktı əsasında azadlığa çıxdığını bildirib. O, oğurladığı geyimləri Ağsu bazarında satıcı işləyən bir qadına satdığını deyib.
Şikarov əməlindən peşman olduğunu və zərərçəkənlərə vurduğu ziyanı ödədiyini bildirərək, barəsində həbs cəzası ilə əlaqəli olmayan cəza təyin edilməsini istəyib.
Lakin zərərçəkənlər dəymiş ziyanın ödənilmədiyini bildiriblər. Onlar təqsirləndirilən şəxsə veriləcək cəza ilə bağlı qərarı məhkəmənin ixtiyarına buraxıblar.
Məhkəmənin hökmü ilə O. Şikarov 3 il 9 ay müddətinə azadlıqdan məhrum edilib.
Mənbə: Modern.аz
