Azərbaycanda bütün seçki məntəqələrində saat 08:00-dan etibarən bələdiyyə seçkiləri ilə əlaqədar səsverməyə start verilib.
Shimal.News xəbər verir ki, ölkə üzrə 118 seçki dairəsində 685 bələdiyyəyə 8 071 bələdiyyə üzvü seçiləcək.
Bələdiyyə seçkilərində səsvermə keçirilən seçki məntəqələrinin sayı 5 846-dır. Bunlardan 5 734-ü daimi, 112-si müvəqqəti məntəqələrdir. Seçkidə səsvermə hüququ olan 5 961 987 seçici iştirak edə biləcək.
Şimal bölgəsi üzrə seçkilərdə 429 məntəqə fəaliyyət göstərəcək və 351 vətəndaş ilk dəfə səs verəcək.
55 saylı Siyəzən-Quba-Xızı dairəsində 73 məntəqədə 50 min 743 seçici iştirak edəcək. Onlardan 112 nəfəri ilk dəfə səsverməyə gələcək.
56 saylı Şabran-Xaçmaz dairəsində 65 məntəqədə 45 min 685 seçici qeydə alınıb və onlardan 65 nəfəri ilk dəfə səs verəcək.
57 saylı Xaçmaz şəhər dairəsində 46 məntəqədə 45 min 942, 58 saylı Xaçmaz kənd dairəsində isə 51 məntəqədə 49 min 850 seçici səs verəcək. Bu dairələrdə müvafiq olaraq 71 və 2 nəfər ilk dəfə səsvermə hüququndan istifadə edəcək.
59 saylı Quba dairəsində 68 məntəqədə 49 min 795, 60 saylı Quba-Qusar dairəsində 61 məntəqədə 51 min 473, 61 saylı Qusar dairəsində isə 65 məntəqədə 52 min 703 seçici qeydə alınıb. Bu dairələrdə müvafiq olaraq 21, 32 və 48 nəfər ilk dəfə səs verəcək.
Bələdiyyə seçkilərində vətəndaşlar yerli idarəetmə orqanlarına öz nümayəndələrini seçəcəklər.
