28 may 1918-ci ildə Azərbaycanın müstəqilliyi haqqında İstiqlal Bəyannaməsi qəbul edildi. Beləliklə, müsəlman Şərqində ilk parlament Respublikası - Azərbaycan Xalq Cümhuriyyəti (AXC) yarandı.
İstiqlal Bəyannaməsini qəbul edən 26 üzvdən biri qubalı Camo bəy Hacınski idi. Camo bəy Hacınski 27 may 1918-ci ildən Azərbaycan Milli Şurasının üzvü olmuşdur. Milli Şura Fətəli xan Xoyskiyə müvəqqəti hökuməti təşkil etməyi tapşırandan sonra Camo bəy Hacınski dövlət nəzarətçisi kimi fəaliyyət göstərmişdir və Azərbaycan Cümhuriyyəti Parlamentinə daxil edilmişdir.
Həmçinin Camo bəy Xalq Cümhuriyyətinin poçt və teleqraf naziri olmuşdur. O, 1919-cu ildə nazirliyə lazım olan teleqraf və telefon avadanlığını əldə etmək üçün Fransa və ya İtaliyanın elektrik departamentləri ilə əlaqə qurmuşdur. Qısa müddətdə dağılmış teleqraf və telefon xətləri bərpa olunmuş, poçt şöbələrinin normal fəaliyyəti bərpa edilmişdir.
1918-ci ildə Hacınski “Türk yurdu” cəmiyyətində Azərbaycan incəsənətindən mühazirələr oxumuş, Azərbaycan və digər mətbuatlarda “qubalı” imzası ilə çıxış etmişdir. Bundan əlavə, o, 1919-1920-ci illərdə Üzeyir Hacıbəylinin əsərlərinin tamaşaları, həmçinin Nəcəf bəy Vəzirov və digərləri haqqında məqalə və resenziyalar yazmışdır. Camo bəy Hacınskinin AXC dövründə mədəni-maarif fəaliyyəti də olmuşdur. Onun 1919-cu ildə Bakı Dövlət Universitetinin yaradılmasında rolu olub.
AXC-nin süqutundan sonra Camo bəy AXC-nin digər dövlət xadimləri kimi repressiyaya məruz qalmışdır. O, 1922 və 1938-ci illərdə həbs edilib, sürgün olunmuşdur. Camo bəy Hacınski 1942-ci ildə Rusiyanın Kirov vilayətinin Vyatna həbs düşərgəsində vəfat edib.
İstinad edilən mənbələr:
