Qadınlar incə və zərif olduğu kimi həm də güclü və iradəlidirlər.
Bizim.Media-nın məlumatına görə, Zaqatalada həyat yoldaşının peşəsini davam etdirən çəkməçi xanımın iş günü səhərin erkən saatlarından başlayır.
Bu da səbəbsiz deyil çünki insanlar adətən təmir olunacaq ayaqqabılarını yaxud digər məişət əşyalarını səhər tezdən gətirib təhvil verib sonra işə gedir. Bu səbəbdən də Fəzilət xanım çalışdığı bazardakı iş yerinə başqalarından tez gəlməyə adət edib.
Fəzilət xanım söhbət əsnasında bildirdi ki, əlindəki işi heç zaman yarımçıq qoymağı sevmir. Bu adət də ona mərhum çəkməçi ərindən qalıb.
"Yoldaşım təzə ayaqqabı tikirdi. Ona kömək edə-edə bu sənəti öyrəndim. Beləcə 35 il yoldaşıma kömək edirdim. O, bir neçə il əvvəl rəhmətə getdi. Bir müddət emalatxananın qapısı bağlı qaldı. Lakin sonradan qərar verdim ki, yox, belə qala bilməz, gərək ora işləsin. Beləcə, həm yoldaşımın ruhuna hörmət əlaməti olaraq, həm də sənətin yaşaması üçün bu addımı atdım" - deyə çəkməçi xanım qeyd edib.
Fəzilət Dadaşova son illər bu sənətin demək olar, arxa plana keçdiyini, marağın azaldığını desə də, onlara tələbatın da olduğunu bildirib.
Çəkməçi xanım hər bir peşənin çətin olduğunu, lakin onu yaşatmaq üçün insandan səbir və əziyyət tələb etdiyini deyib.
