Zaqatala rayonunda builki qəbul imtahanlarının nəticələri ilə bağlı uğurlu göstəricilər açıqlanıb.
Shimal.News xəbər verir ki, Zaqatala Rayon Heydər Əliyev Mərkəzində "Təhsil zirvəsinə doğru – Azərbaycan gəncləri" mövzusunda tədbir keçirilib.
Tədbirdə bildirilib ki, ali məktəbə qəbul üçün sənəd verən 623 zaqatalalı məzundan 535-i tələbə adını qazanıb. Beləliklə, qəbul imtahanlarında iştirak edən məzunların 86 faizi ali məktəblərə qəbul olunub.
Çıxışlarda son illərdə rayonda təhsilin maddi-texniki bazasının gücləndirilməsi, məktəblərin tikintisi və əsaslı təmiri, eləcə də informasiya texnologiyalarının tətbiqi istiqamətində görülən işlərdən danışılıb.
Milli Məclisin deputatları Asif Əsgərov və Azər Kərimli tələbə adını qazanan məzunları təbrik edərək onlara uğurlar arzulayıblar.
Tədbirin sonunda qəbul imtahanlarında yüksək nəticə göstərən zaqatalalı məzunlara hədiyyələr təqdim olunub.
