Zaqatala şəhərindən keçən Talaçay və Zilbançayda sel və daşqın riskinin azaldılması məqsədilə bu il ümumilikdə 1000 metr uzunluğunda yeni beton bəndlərin inşası planlaşdırılır. Artıq Talaçayda 300 metrlik hissə üzrə işlər yekunlaşıb.
Shimal.News xəbər verir ki, bu barədə Azərbaycan Dövlət Su Ehtiyatları Agentliyinin Zaqatala Su Meliorasiya Sistemlərinin İstismarı İdarəsinin baş mühəndisi Ceyhun Mirzəyev məlumat verib.
Onun sözlərinə görə, ötən il baş verən daşqınlardan sonra Talaçayın Zaqatala şəhərinin Nizami küçəsindən keçən hissəsində yerləşən və istismar müddətini başa vurmuş köhnə beton bəndlər təhlükə mənbəyinə çevrilmişdi. Bu səbəbdən ilin əvvəlindən ərazidə yeni bəndlərin tikintisinə başlanılıb və artıq 300 metrlik hissədə işlər tamamlanıb.
Baş mühəndis bildirib ki, növbəti mərhələdə Zaqatala şəhərinin mərkəzindən keçən Zilbançayın sağ və sol sahillərində 700 metr uzunluğunda beton bəndlərin inşası nəzərdə tutulur.
Qeyd olunub ki, layihələrin əsas məqsədi şəhər və ətraf yaşayış məntəqələrinin sel sularından qorunmasını təmin etməkdir. Bununla yanaşı, rayon ərazisindən keçən digər dağ çaylarında da məcratənzimləmə, sahilbərkitmə və torpaq işləri davam etdirilir.
Ceyhun Mirzəyev vurğulayıb ki, Zaqatalada ilk dəfə olaraq bir il ərzində 1000 metrdən çox beton bəndin inşası həyata keçiriləcək. Bununla yanaşı, digər riskli ərazilərdə də yeni mühafizə qurğularının tikintisi üçün müvafiq müraciətlər hazırlanıb.
