Zaqatala rayonunda Birinci Qarabağ müharibəsində itkin düşən döyüşçülərin xatirəsi anılıb.
Bizim.Media-nın məlumatına görə, Birinci Qarabağ müharibəsi zamanı Şuşa istiqamətində gedən döyüşlərdə itkin düşən 8 zaqatalalı döyüşçünün xatirəsinə ucaldılan abidə bu gün yüzlərlə insan tərəfindən ziyarət olunub.
İtkin düşərək şəhidlik zirvəsinə ucalan döyüşçülər:
Abdulla Eminov və Afər Mütəlibov – Zaqatala şəhəri,
Aslan Babasiyev və Bayram Səfərov – Aşağı Tala kəndi,
Əhməd Abdilov, Akif Rəsulov və Oruc Rəsulov – Muğanlı kəndi,
Əkbər Məmmədov isə Çobankol kəndi sakini olub.
Səhər saatlarından etibarən Car kəndi qəbiristanlığında yerləşən itkin şəhidlərin xatirə abidəsini yerli sakinlər, şəhid ailələri və qazilər ziyarət edərək dualar oxuyub, abidə önünə gül dəstələri düzüblər.
Şəhid ailələri illər keçməsinə baxmayaraq yaxınlarının taleyindən xəbər gözlədiklərini, nə vaxtsa onların nəşlərinin tapılaraq doğma torpaqda dəfn olunacağına ümid etdiklərini bildiriblər.
