Havaların isinməsi ilə birlikdə ilanlar qış yuxusundan oyanaraq daha fəal hərəkət etməyə başlayıb. Xüsusilə kənd təsərrüfatı sahələrində, hündür otluq və kolluq ərazilərdə, su kənarlarında ilanlara daha tez-tez rast gəlinir.
Son günlər Zaqatala rayonunun Yuxarı Çardaqlar kəndində iki nəfəri ilan sancıb. Onlardan biri həyatını itirib, digər sakin – İsmayıl Lalayev isə vaxtında göstərilən tibbi yardım sayəsində sağ qalıb.
Mütəxəssislər bildirirlər ki, ilan sancması zamanı təşvişə düşmək olmaz. Zərərçəkən hərəkətsiz saxlanılmalı, sancılan ətraf mümkün qədər immobilizasiya edilməli və dərhal tibb müəssisəsinə çatdırılmalıdır. Yaraya müdaxilə etmək və ya özbaşına üsullardan istifadə etmək tövsiyə edilmir.
Ekspertlərin sözlərinə görə, ilanlar xüsusilə isti havalarda və cütləşmə dövründə daha aktiv olur. Buna görə də hündür otlu və kolluq ərazilərdə işləyən və ya hərəkət edən şəxslərə qapalı ayaqqabı geyinmək, diqqətli olmaq və müəyyən edilmiş cığırlardan istifadə etmək tövsiyə edilir.
Yerli sakinlər isə bildirirlər ki, əvvəllər kəndlərdə ilanları uzaqlaşdırmaq üçün müxtəlif ənənəvi üsullardan istifadə olunurdu. Bununla belə, təhlükəsizlik baxımından ən etibarlı yol ehtiyatlı davranmaq və ilanla qarşılaşdıqda ona yaxınlaşmamaqdır.
