Zaqatala şəhərində əhalinin ən çox istifadə etdiyi yollardan biri yararsız hala düşüb.
Shimal.News məlumat verir ki, Sakinlərin sözlərinə görə, "bazar yolu" kimi tanınan ərazidə asfalt örtüyü ciddi şəkildə dağılıb, dərin çuxurlar yaranıb. Onlar bildirirlər ki, problemlə bağlı müvafiq qurumlara müraciət etsələr də, hələlik nəticə əldə olunmayıb.
Məsələ ilə bağlı açıqlama verən aidiyyəti qurum qeyd edib ki, son günlər yağan aramsız yağışlar yalnız bu küçədə deyil, digər ərazilərdə də oxşar fəsadlara səbəb olub. Bildirilib ki, intensiv yağıntılar və sel suları nəticəsində sözügedən yolda çuxurlar daha da dərinləşib.
Qurumdan verilən məlumata görə, məsələ nəzarətə götürülüb və hava şəraiti sabitləşdikdən sonra ərazidə təmir-bərpa işlərinin aparılması planlaşdırılır.
