Zaqatala rayonunda yetişdirilən arı populyasiyalarının genetik xüsusiyyətlərinin öyrənilməsi istiqamətində elmi tədqiqatlar aparılıb.
Arı nümunələrinin molekulyar-genetik xüsusiyyətlərini müəyyənləşdirmək məqsədilə Elm və Təhsil Nazirliyinin Genetik Ehtiyatlar İnstitutunun laboratoriyasında DNT ekstraksiyası həyata keçirilib.
İnstitutun Kənd təsərrüfatı heyvanlarının genetik ehtiyatları şöbəsinin müdiri, AMEA-nın müxbir üzvü, professor Saleh Məhərrəmovun sözlərinə görə, əldə olunan genom DNT-si yerli arı populyasiyalarının genetik müxtəlifliyinin, Qafqaz arısı (Apis mellifera caucasica) ilə genetik yaxınlığının və digər arı cinslərindən fərqlərinin müəyyənləşdirilməsi üçün istifadə olunacaq.
Qeyd edilib ki, Zaqatalada əsasən Qafqaz dağ arısı yayılıb. Bu arı cinsi sakit xasiyyəti, uzun xortumu, aşağı oğulvermə meyli, soyuq və rütubətli iqlimə davamlılığı, eləcə də yüksək məhsuldarlığı ilə seçilir. Xüsusilə şabalıd, akasiya və cökə kimi nektarlı bitkilərdən keyfiyyətli bal toplamaq qabiliyyəti ilə fərqlənir.
Araşdırmanın nəticələrinin Azərbaycanın qiymətli arı genofondunun qorunmasına, yerli arı populyasiyalarının davamlı inkişafına və elmi əsaslarla seleksiya proqramlarının hazırlanmasına mühüm töhfə verəcəyi bildirilir.
Mənbə: AZƏRTAC
