Yaponiyanın Tokio Universitetində doktorantura təhsili alan gənc tədqiqatçı Hiromu Nakao Zaqatalada Azərbaycan florasında yayılan "Marchantia polymorpha" mamır növünün təbii populyasiyalarından nümunələr toplayıb.
Nakao Elm və Təhsil Nazirliyinin Botanika İnstitutunun alimləri – biologiya üzrə fəlsəfə doktorları, dosent Aygün Məmmədova və dosent Arzu Hüseynova ilə birgə Zaqatala rayonuna ekspedisiya təşkil edib.
Ekspedisiya zamanı Car və Qəbizdərə kəndləri ərazilərində "Marchantia polymorpha" növünün təbii populyasiyalarından herbari nümunələri götürülüb.
Tədqiqatın əsas məqsədi Şimal yarımkürəsinin müxtəlif ərazilərində yayılan bu növün populyasiyalarında genetik müxtəlifliyi və gen kodlarını müasir molekulyar-genetik üsullarla öyrənməkdir.
Səfər çərçivəsində Hiromu Nakao Botanika İnstitutunda elmi seminar da keçirib. Seminarda "Marchantia polymorpha" növünün dünyada yayılması, populyasiyalarının genetik müxtəlifliyi və aparılan araşdırmaların əsas istiqamətləri barədə məlumat verilib.
Tədqiqatçı ilə institutun alimləri arasında fikir mübadiləsi aparılıb. Birgə araşdırmaların nəticələri əsasında elmi məqalənin hazırlanması planlaşdırılır.
Mənbə: Azərtac
