Xudat şəhər 4 nömrəli məktəb-liseyin bağlanacağı və 9 illik məktəbə çevriləcəyi ilə bağlı yayılan iddialara aydınlıq gətirilib.
Məsələ ilə bağlı Shimal.News-un sorğusuna cavab olaraq Quba-Xaçmaz Regional Təhsil İdarəsindən bildirilib ki, məktəb-liseyin bağlanacağı ilə bağlı yayılan iddialar həqiqəti əks etdirmir.
"Adıçəkilən təhsil müəssisəsi növbəti tədris ilindən etibarən yeni təmayül tədris modeli çərçivəsində fəaliyyət göstərəcək.
Yeni təmayül siniflərinə qəbul əsasən IX sinif üzrə buraxılış imtahanlarında yüksək nəticə göstərən və akademik potensiala malik şagirdlər arasından elektron qeydiyyat vasitəsilə həyata keçirilir.
Yeni modelin əsas məqsədi şagirdlərin əlavə hazırlıq kurslarına ehtiyac duymadan, məktəbdə təşkil olunan gücləndirilmiş tədris prosesi vasitəsilə ali təhsil müəssisələrinə qəbul üçün zəruri bilik və bacarıqlara yiyələnməsini təmin etməkdir.
Əlavə olaraq bildiririk ki, Xudat şəhər 4 nömrəli məktəb-liseydə təhsil alan şagirdlər təhsillərini növbəti tədris ilində də həmin təhsil müəssisəsində davam etdirəcəklər və başqa məktəblərə yönləndirilməyəcəklər", - deyə açıqlamada qeyd edilib.
