Xaçmaz rayonunun Xudat şəhərində elektrik təsərrüfatının vəziyyəti sakinlərin narazılığına səbəb olub.
Məsələ ilə bağlı Shimal.News-a danışan sakinlərin sözlərinə görə, ərazidəki elektrik dirəklərinin bir qismi qəzalı vəziyyətdədir. Bəzi dirəklərin taxta hissələri çürüyüb, bəziləri isə aşmaq üzrədir. Elektrik naqillərinin bir hissəsi isə yerə yaxın vəziyyətdədir ki, bu da təhlükə yaradır.
"Axşam saatlarında elektrik gərginliyi bəzən 100 voltdan da aşağı düşür. Bu zaman bir çox elektrik cihazımız işləmir.
Bunun qarşısını almaq üçün stabilizatorlardan istifadə etsək də, gərginlik həddindən artıq zəif olduğu üçün bu cihazlar da tez-tez sıradan çıxır", - deyə sakinlər bildiriblər.
"Evimdə artıq 4 stabilizator yararsız vəziyyətə düşüb. Ən sonda 20 kVA gücündə tənzimləyici aparat almışam. Bu aparat da yansa, evdə heç bir elektrik qurğusu işləməz", - deyə şikayətçilərdən biri qeyd edib.
Sakinlər problemin aradan qaldırılması üçün aidiyyəti qurumlardan ərazidəki elektrik xətlərinin və dirəklərin yenilənməsini tələb edirlər.
