Xaçmaz rayonunun Xudat şəhərində uzun illərdir baxımsız vəziyyətdə olan Əliağa Şıxlinski küçəsində asfaltlama işlərinə başlanılıb.
Shimal.News xəbər verir ki, şəhərin sözügedən küçəsinə 44 ildən sonra ilk dəfə asfalt örtüyü çəkilir.
Xatırladaq ki, Shimal.News 2023-cü ildə Xudat şəhərinin mərkəzi küçələrinin vəziyyəti ilə bağlı "Xudat şəhərinin mərkəzi küçələri baxımsız vəziyyətdədir" sərlövhəli material dərc etmişdi.
Həmin yazıda sakinlərin küçələrdə asfalt örtüyünün dağıldığını, yaranan çala-çuxurların avtomobillərin və piyadaların hərəkətini çətinləşdirdiyini bildirdikləri qeyd olunurdu. Yağıntılı havalarda isə küçələrin su ilə dolduğu və hərəkətin daha da çətinləşdiyi vurğulanmışdı.
Məsələ ilə bağlı Xaçmaz Rayon İcra Hakimiyyəti başçısının müavini Bəxtiyar Osmanov bildirmişdi ki, şəhər ərazisində daxili yolların təmiri üçün müvafiq müraciət hazırlanıb.
O, küçələrin asfalt örtüyünün yenilənməsi üçün lazımi tədbirlərin görüldüyünü və vəsait ayrıldıqdan sonra işlərə başlanacağını demişdi.
Aradan üç il keçdikdən sonra həmin istiqamətdə işlərə başlanılması Xudat sakinlərinin uzun müddətdir gözlədiyi yol probleminin həllinə ümid yaradıb.
