Xaçmaz rayonunun Xudat şəhərində yerləşən Kərim Məhərrəmov adına 3 nömrəli tam orta ümumtəhsil məktəbində 2026-2027-ci tədris ili üçün nəzərdə tutulan təmir, abadlıq və hazırlıq işləri yekunlaşıb.
Shimal.News xəbər verir ki, 1050 şagirdin daha rahat, təhlükəsiz və əlverişli şəraitdə təhsil alması, müəllimlərin isə fəaliyyətlərini yüksək səviyyədə həyata keçirməsi üçün məktəbdə bir sıra işlər görülüb.
Belə ki, tavanı çökmüş müəllimlər otağı və bir sinif otağı təmir olunub. Məktəbin bütün sinif otaqları və dəhlizləri təmir edilib, həyətyanı ərazi təmizlənərək səliqəyə salınıb.
Bundan əlavə, istifadəyə yararsız vəziyyətə düşmüş parta və stullar təmir olunub, dam örtüyündə qırılmış şiferlər bərpa edilib, sanitar qovşaqlara qapılar əlavə olunub. Sinif otaqları və dəhlizlər tam şəkildə təmizlənib, inventar anbarları səliqəyə salınıb.
Məktəbin istilik sistemi də yoxlanılaraq qarşıdan gələn qış mövsümünə hazır vəziyyətə gətirilib.
Qeyd olunub ki, görülən işlər nəticəsində məktəbin həm tədris mühiti, həm də ümumi görünüşü yaxşılaşdırılıb.
