Son iki gündə Xəzər dənizində 5 zəlzələ qeydə alınıb. Mütəxəssislər bildirirlər ki, bu aktivlik regiondakı digər seysmik zonalara, o cümlədən Şamaxı və İsmayıllı ərazilərinə də təsir göstərə bilər.
Shimal.News məlumat verir ki, geoloqların fikrinə əsasən, baş verən təkanlar yerin dərin qatlarında yaranan gərginliyin tədricən boşalması ilə bağlıdır və bu, "seysmik sürü" adlanan təbii proses hesab olunur.
Qeyd edilir ki, Azərbaycan ümumilikdə seysmik fəal zonada yerləşdiyi üçün belə təkanlar normaldır. Şamaxı–İsmayıllı zonasında da hiss olunan zəif zəlzələlərin baş vermə ehtimalı var.
Bununla belə, mütəxəssislər dağıdıcı zəlzələ ehtimalının aşağı olduğunu vurğulayaraq, panikaya əsas olmadığını bildirirlər.
