Quba rayonunun Xanəgah kəndində avtomobil yolunun vəziyyəti sakinlərin narahatlığına səbəb olub. Kənd ərazisindən keçən asfalt örtüyündə uzun müddətdir yaranan iri çat və çökmələr hərəkəti çətinləşdirir.
Shimal.News-a danışan sakinlərin sözlərinə görə, yol təxminən bir ildən çoxdur bu vəziyyətdədir və son yağışlardan sonra çat daha da genişlənib. Bildirilir ki, xüsusilə iki avtomobil üz-üzə gələndə sürücülər təhlükədən yayınmaq üçün əks istiqamətə çıxmağa məcbur olurlar.
Kənd sakinləri qeyd edirlər ki, yaranmış vəziyyət qəza riskini artırır və gecə saatlarında yol daha təhlükəli hal alır.
Sakinlər aidiyyəti qurumlardan yolun qısa müddətdə bərpasını və təhlükənin aradan qaldırılmasını tələb edirlər.
