Xaçmaz şəhərinin Mirzə Ələkbər Sabir küçəsinin sakinləri uzun illərdir davam edən elektrik problemi ilə üz-üzə qaldıqlarını bildirirlər.
Məsələ ilə bağlı Shimal.News-a danışan sakinlərin sözlərinə görə, küçədə transformatorla bağlı problem illərdir həllini tapmır. Təxminən 3 il əvvəl ərazidə kabelləşmə işləri aparılıb və sakinlərə yeni transformator quraşdırılacağı bildirilib.
Lakin onların iddiasına görə, aradan uzun müddət keçsə də problem aradan qaldırılmayıb.
Şikayətçilərin iddiasına görə, bir neçə gün əvvəl küçəyə yeni transformator qoyulsa da, o cəmi bir gün işləyib və sonra sıradan çıxıb.
"Daha sonra gəlib Rəsul Rza küçəsinin elektrik xəttini bizim küçəyə qoşdular. Amma yenə də vəziyyət dəyişməyib. Axşam saatlarında işığın gücü 160 volta düşür. Heç bir məişət avadanlığından normal istifadə edə bilmirik", - deyə sakinlər bildiriblər.
Onların sözlərinə görə, xüsusilə axşam saatlarında aşağı gərginlik səbəbindən həm məişət texnikaları risk altına düşür, həm də gündəlik yaşayış çətinləşir.
Sakinlər aidiyyəti qurumlardan problemin qısa zamanda həll olunmasını istəyirlər.
