Bu gün şəhid Devid Cəlilovun doğum günüdür.
Devid Raufoviç Cəlilov 29 fevral 2004-cü ildə Xaçmaz rayonunun Köhnə Xudat qəsəbəsində anadan olub. Orta təhsilini Xudat şəhər 3 saylı orta məktəbdə alıb. Təhsilini başa vurduqdan sonra, 2022-ci ilin aprel ayında Azərbaycan Silahlı Qüvvələrinin sıralarına həqiqi hərbi xidmətə çağırılıb.
Hərbi xidmətinin başa çatmasına cəmi 10 gün qalmış, 20 sentyabr 2023-cü il tarixində Azərbaycan Ordusunun həyata keçirdiyi uğurlu lokal antite**or əməliyyatı zamanı Ağdərə rayonunda şəhidlik zirvəsinə ucalıb.
Şəhidin anası Sevinc Cəlilovanın sözlərinə görə, Devid döyüş zamanı qəlpə yarası alsa da, geri göndərilməsinə etiraz edib. Yaralı halda belə mövqeyini tərk etməyib, yarasını sarıtdıqdan sonra döyüş yoldaşlarını neytral zonadan çıxararaq təhlükəsiz əraziyə çatdırıb.
Ailənin sonbeşiyi, iki bacının yeganə qardaşı olan Devid 19 yaşında qazandığı şəhidlik adı ilə yaddaşlarda əbədi yaşayacaq.
