Xaçmaz şəhərinin bir sıra küçələrində yolların vəziyyəti sakinlərin və sürücülərin narazılığına səbəb olub.
Shimal.News-a daxil olan məlumata görə, şəhərin müxtəlif ərazilərində asfalt örtüyündə yaranan çalalar, çökmələr və çuxurlar nəqliyyat vasitələrinin hərəkətini çətinləşdirir. Sürücülərin sözlərinə görə, bəzi küçələrdə avtomobillərin çuxurlardan yayınmaq üçün sağa və sola manevr etməsi digər hərəkət iştirakçıları üçün də təhlükə yaradır.
Problemlərin daha çox Nərimanov prospekti, Qudyalçaylı, Mustafa Kamal Atatürk, 28 May, Mehdi Hüseynzadə, Üzeyir Hacıbəyov və İsmət Məmmədov küçələrində müşahidə edildiyi bildirilir. Sakinlər qeyd edirlər ki, sadalananlardan başqa bir çox küçə və məhəllədaxili yollarda da oxşar vəziyyət hökm sürür.
Vətəndaşlar aidiyyəti qurumları yollarda yaranmış problemlərin aradan qaldırılması üçün tədbir görməyə çağırırlar.
