Xaçmaz şəhərinin mərkəzində illərdir davam edən baxımsızlıq ciddi narazılıq doğurur.
Shimal.News-a müraciət edən sakinlərin bildirdiyinə görə, H.Z.Tağıyev küçəsində, fərdi yaşayış evlərinin arasında yerləşən boş ərazi uzun müddətdir nəzarətsiz qalıb və artıq sözün əsl mənasında "cəngəlliyi" xatırladır.
Sakinlər qeyd edirlər ki, vaxtilə həmin ərazidə məscid tikintisinə başlanılsa da, müvafiq icazələr olmadığı üçün işlər yarımçıq dayandırılıb. Bundan sonra isə ərazi taleyin ümidinə buraxılıb. Nəticədə kolluq, alaq otları, tullantılar və küçə itləri təhlükə mənbəyinə çevrilib.
"Bura nə ucqar kənd yoludur, nə də sahibsiz torpaq sahəsi. Ətraf tamamilə yaşayış evləridir. Gecə saatlarında buradan keçmək qorxuludur, üfunət isə dözülməz həddə çatıb. Aidiyyəti qurumların bu vəziyyətə göz yumması başa düşülən deyil", – deyə sakinlər bildiriblər.
Vətəndaşlar mərkəzi küçədə yaranmış bu biabırçı mənzərəyə nəzarətin təmin edilməsini və ərazinin təcili olaraq abadlaşdırılmasını tələb edirlər.
