2025-ci ilin oktyabr ayından etibarən mal-qara arasında dabaq xəstəliyinin yayılması ilə əlaqədar ölkə üzrə fəaliyyət göstərən bir sıra heyvan satışı bazarları bağlanıb.
Hazırda bəzi bazarlar (Binə, Bərdə, Göygöl, Salyan, Göyçay, Şamaxı, İmişli, Ağcabədi, Beyləqan, Biləsuvar, Kürdəmir, Abşeron, Masallı və Ağsu) yenidən fəaliyyətə başlasa da, Şimal bölgəsində yerləşən Xaçmaz rayonunun yeganə və ən böyük heyvan bazarının qapıları hələ də bağlıdır.
Bu isə fermerləri çətin vəziyyətə salıb. Bəs görəsən, Xaçmaz bazarının fəaliyyəti nə vaxt bərpa olunacaq?
Məsələ ilə bağlı Shimal.News-un sorğusuna cavab olaraq Azərbaycan Qida Təhlükəsizliyi Agentliyindən bildirilib ki, yenidənqurma işlərinin qiymətləndirilməsi məqsədilə yaradılmış komissiya tərəfindən 12 iyun 2026-cı il tarixində Xaçmaz rayonunun Armudpadar kəndi ərazisində yerləşən, "Şamil" MMC-yə məxsus heyvan bazarında qiymətləndirmə aparılıb.
"Qiymətləndirmə zamanı bazarda bir sıra nöqsanlar aşkarlanıb. Nöqsanların aradan qaldırılması ilə bağlı Agentliyin əməkdaşları tərəfindən müvafiq göstərişlər verilib. Hazırda qeyd olunan heyvan bazarında normativ tələblərin təmin olunması məqsədilə yenidənqurma işləri davam etdirilir. Yenidənqurma işləri tam yekunlaşdırıldıqdan sonra bazarda təkrar qiymətləndirmə aparılacaq və nəticələrə uyğun olaraq bazarın fəaliyyətinin bərpası ilə bağlı müvafiq rəy veriləcək".
Beləliklə, Xaçmaz heyvan bazarının nə vaxt açılacağı hələlik məlum deyil.
