Xaçmaz şəhərinin ən işlək nəqliyyat qovşaqlarından biri hesab edilən "Xaçmaz dairəsi"ndə piyadaların təhlükəsizliyi ilə bağlı ciddi problem yaşanır.
Shimal.News xəbər verir ki, Nəriman Nərimanov prospekti ilə Bakı–Xaçmaz, Quba–Xaçmaz və Xudat–Xaçmaz magistrallarının kəsişdiyi ərazidə piyada keçidlərinin olmaması sakinlərin narazılığına səbəb olur.
Onların sözlərinə görə, gün ərzində minlərlə insanın istifadə etdiyi bu ərazidə nə nizamlanan, nə də nizamlanmayan piyada keçidi mövcuddur. Halbuki dairənin ətrafında iri ticarət obyektləri, ictimai iaşə məkanları və bölgələrarası taksi dayanacaqları fəaliyyət göstərir.
Bildirilir ki, piyadalar yolu keçmək üçün hərəkətdə olan avtomobillərin yoluna çıxmaq məcburiyyətində qalır, sürücülər isə qəfil manevrlər edirlər. Bu isə ərazidə tez-tez təhlükəli vəziyyətlərin və yol-nəqliyyat hadisələrinin yaranmasına səbəb olur.
Vətəndaşlar aidiyyəti qurumlardan ərazidə piyada keçidlərinin təşkil edilməsini, təhlükəsizlik tədbirlərinin gücləndirilməsini və hərəkətin tənzimlənməsini xahiş edirlər.
