Xaçmaz rayonunun Mollabürhanlı kəndində sakinlər qanunsuz ağac kəsimi ilə bağlı narazılıq edirlər.
Məsələ ilə bağlı Shimal.News-a danışan kənd sakinlərinin sözlərinə görə, dövlətə məxsus torpaq sahəsində yerləşən və illərdir ziyarət edilən, "Bənövşə" adı ilə tanınan pirin ərazisində ağaclar kəsilir, həmçinin həyətinə gübrə və heyvan peyini tökülür.
Sakinlər bildiriblər ki, əraziyə tökülən peyin və gübrə səbəbindən ətrafa kəskin qoxu yayılır:
"Biz pəncərələrimizi açıb təmiz hava ala bilmirik. İsti havalarda isə vəziyyət daha da ağırlaşır. Həmin hərəkətləri törədən şəxsə dəfələrlə xəbərdarlıq etmişik. Lakin xəbərdarlıqlara baxmayaraq, o, əməlini dayandırmayıb".
Kənd əhalisi problemin aradan qaldırılması üçün aidiyyəti qurumların məsələyə müdaxilə etməsini xahiş edir.
