Niyazabad şəhərinin Günəşli küçəsinin sakinləri ərazidə yol infrastrukturunun olmaması və elektrik şəbəkəsində aşağı gərginlik probleminin uzun müddətdir davam etdiyini bildirirlər.
Shimal.News-a müraciət edən sakinlərin sözlərinə görə, Bakı prospektindən Niyazabad istiqamətinə gedən yol daş-çınqıl örtüyündən ibarətdir. Hazırda quraq hava şəraiti səbəbindən yoldan istifadə mümkün olsa da, yağışlı günlərdə küçə palçığa çevrilir və hərəkət demək olar ki, mümkünsüz olur.
Sakinlər bildirirlər ki, ərazidə elektrik enerjisi kəsilməsə də, şəbəkədə gərginlik normadan xeyli aşağı olur. Onların sözlərinə görə, gündüz saatlarında gərginlik 134-150 volt arasında dəyişir ki, bu da məişət cihazlarının normal işləməsinə maneə yaradır və onların sıradan çıxması riskini artırır.
Sakinlər aidiyyəti qurumlardan Günəşli küçəsinin abadlaşdırılmasını, yolun asfaltlanmasını və elektrik şəbəkəsindəki aşağı gərginlik probleminin aradan qaldırılmasını xahiş edirlər.
