Xaçmazda bacısı qızlarını sevən 17 yaşlı yeniyetməyə qarşı zorakılıq edən iki qardaş barədə məhkəmə qərarı açıqlanıb.
Ötən ilin sonunda baş vermiş hadisə ilə bağlı çıxarılan hökmə əsasən, təqsirləndirilən qardaşlardan biri həbsdə qalıb, digəri isə şərti cəza ilə azadlığa buraxılıb.
İş materiallarına görə, 17 yaşlı oğlan bu qardaşların bacısı qızları ilə sevgi münasibətində olub. Hadisə günü yeniyetmə qızın yaşadığı evin hasarına çıxarkən dayılardan biri onu görərək digər qardaşı ilə birlikdə saxlayıb.
İttihama əsasən, qardaşlar yeniyetmənin əl-qolunu kəndirlə bağlayaraq təxminən bir saat qanunsuz saxlayıb, onu döyüb, müxtəlif xəsarətlər yetirib və tualetdə bağlı vəziyyətdə saxlayıblar.
Faktla bağlı Cinayət Məcəlləsinin qanunsuz azadlıqdan məhrumetmə maddəsi ilə cinayət işi açılıb. Xaçmaz Rayon Məhkəməsinin hökmü ilə hər iki təqsirləndirilən şəxsə 3 il azadlıqdan məhrumetmə cəzası verilib və onlar məhkəmə zalında həbs ediliblər.
Lakin Sumqayıt Apellyasiya Məhkəməsi kiçik qardaşın apellyasiya şikayətini qismən təmin edib. Məhkəmə onun səmimi peşman olmasını, səhhətində problemlərin olmasını və himayəsində yaşlı valideynlərinin olmasını nəzərə alaraq cəzasını şərti cəza ilə əvəz edib.
Digər təqsirləndirilən şəxsin apellyasiya şikayəti isə təmin olunmayıb və o, cəzasını çəkməyə davam edəcək.
Mənbə: Qafqazinfo.az
