Xaçmaz rayonunun Xuray və Seyidlikəndyeri kəndlərində 30-a yaxın 10 və 11-ci sinif şagirdi təhsilini davam etdirməkdə çətinlik çəkir.
Shimal.News-a məlumat verən yerli sakinlər bildirib ki, problem hər iki kənddə şagirdlərin tam orta təhsil ala biləcəyi məktəbin olmaması ilə bağlıdır. Belə ki, Xuray kəndində yalnız ibtidai təhsil imkanları mövcuddur, Seyidlikəndyeri kəndində isə fəaliyyət göstərən məktəb 9 illik ümumtəhsil statusundadır.
Yuxarı siniflərdə təhsilini davam etdirmək istəyən şagirdlər 8-9 kilometr aralıda yerləşən Aslanoba kənd tam orta məktəbinə getməli olurlar.
Valideynlərin sözlərinə görə, əvvəlki illərdə uşaqların məktəbə gedib-gəlməsi üçün öz vəsaitləri hesabına mikroavtobus tutulub. Lakin hazırda bir şagird üçün aylıq nəqliyyat xərcinin 40 manata çatması ailələrə əlavə maliyyə yükü yaradıb. Vətəndaşlar bu xərcləri qarşılaya bilmədiklərini deyərək, məhz bu səbəbdən övladlarını məktəbə göndərmədiklərini bildiriblər.
Sakinlər Aslanoba kənd tam orta məktəbinə gedən şagirdlər üçün nəqliyyatın təşkil olunmasını tələb edirlər.
Məsələ ilə bağlı Quba-Xaçmaz Regional Təhsil İdarəsi Shimal.News-un sorğusuna cavab olaraq bildirilib ki, Xaçmaz rayonunun Xuray kənd ibtidai ümumtəhsil məktəbi yalnız ibtidai təhsil səviyyəsi üzrə fəaliyyət göstərir.
"Şagirdlərin ümumi və tam orta təhsil səviyyəsi üzrə təhsil almaları üçün valideynlər qonşu Aslanoba kəndinə yönləndirilir. Şagirdlərin daşınması təhsil müəssisəsinin iştirakı olmadan valideynlər və özəl servisi həyata keçirən tərəflər arasında bağlanmış müqaviləyə uyğun həyata keçirilə bilər. İdarə tərəfindən tərəflər arasında bağlanmış xidməti müqavilə və ya razılaşmaya müdaxilə edilmir. Bildiririk ki, valideynlərin müraciəti əsasında regional təhsil idarəsi tərəfindən şagirdlərin daşınması imkanları ilə bağlı dəyərləndirmələr aparılır".
