Yeni tədris ilinin başlaması ilə məktəblərin qarşısında şagirdlərin təhlükəsizliyinin təmin olunması məsələsi yenidən gündəmə gəlib.
Xaçmaz şəhərində Cəfər Cabbarlı adına 6 nömrəli tam orta məktəbin yaxınlığında piyada zolaqlarının silinməsi valideyn və sakinlərin narazılığına səbəb olub. Bildirilir ki, bəzi keçidlərdən demək olar, əsər-əlamət qalmayıb.
Shimal.News-a danışan sakinlər uşaqların yolu keçərkən çətinlik çəkdiyini və avtomobillərin sürətlə hərəkət etdiyini deyiblər.
"Uşaqlar yolu keçə bilmir, maşınlar adamın üstünə gəlir. Xətt də yoxdur. Biz məcburuq ki, özümüz aparıb-gətirək. O yol çox qorxulu yoldur. İşıqfor yoxdur, piyada xətti yoxdur", – sakinlərdən biri bildirib.
Valideynlər məktəb ətrafında piyada keçidlərinin yenilənməsini və şagirdlərin təhlükəsizliyi üçün zəruri tədbirlərin görülməsini istəyirlər.
