Xaçmaz şəhərində yerləşən Ramil Sadıqov küçəsində yeraltı su xəttinin zədələnməsi ciddi problem yaradıb.
Shimal.News-a müraciət edən sakinlərin sözlərinə görə, borunun partlaması nəticəsində su günlərdir küçəyə axır. Davamlı sızma səbəbindən yolun asfalt örtüyü də çökərək təhlükəli vəziyyət yaradıb.
Sakinlər bildirirlər ki, indiyədək aidiyyəti qurum tərəfindən əraziyə nə baxış keçirilib, nə də problemin həlli istiqamətində bir addım atılıb. Suyun küçəni və həyətləri basmasının qarşısını almaq üçün ərazidə yaşayanlar yaxınlıqdakı kanalizasiya lüklərinin qapaqlarını açıblar. Bu isə suyun həmin istiqamətdə axmasını təmin etmək üçün nəzərdə tutulub.
Onların sözlərinə görə, bu çıxış yolu həm müvəqqətidir, həm də piyadalar və nəqliyyat vasitələri üçün əlavə təhlükə yaradır. Açıq qalan lüklar istənilən an bədbəxt hadisəyə səbəb ola bilər.
Sakinlər aidiyyəti qurumları problemi təxirəsalınmadan aradan qaldırmağa, zədələnmiş xətti təmir etməyə, çökmüş yol hissəsini bərpa etməyə və ərazidə yaranmış təhlükəli vəziyyətin qarşısını almağa çağırırlar. Təmir işlərinin gecikməsi həm yol örtüyünün daha da sıradan çıxmasına, həm də ətraf ərazilərin su altında qalmasına səbəb ola bilər.
