Xaçmaz rayonunun İstisu qəsəbəsi ərazisində aprelin əvvəlində yağan intensiv yağışlar nəticəsində yolun bir hissəsi tamamilə çökərək yararsız vəziyyətə düşüb.
Shimal.News-a daxil olan məlumata görə, hadisədən təxminən bir ay keçməsinə baxmayaraq, sözügedən ərazidə hələ də heç bir təmir-bərpa işləri aparılmayıb.
Sakinlər bildirirlər ki, yolun bu vəziyyətdə qalması həm nəqliyyatın hərəkətini çətinləşdirir, həm də ciddi təhlükə yaradır.
Çökmə nəticəsində yolun bir hissəsi tamamilə dağılıb, asfalt örtüyü yarılıb, suötürücü hissələr isə zədələnib.
Hazırda ərazi təhlükəli olaraq qalır və sürücülər alternativ yollardan istifadə etməyə məcbur olurlar.
Məsələ ilə bağlı Azərbaycan Avtomobil Yolları Dövlət Agentliyinin (AAYDA) İctimaiyyətlə əlaqələr şöbəsinin rəhbəri Anar Nəcəfli açıqlama verib:
"Artıq bununla bağlı ölkə başçısı tərəfindən müvafiq sərəncam imzalanıb. Həmin sənəddə Xaçmaz-Xudat-Yalama avtomobil yolunun zərər görmüş hissəsinin bərpası da nəzərdə tutulur. Yaxın günlərdə sərəncama uyğun olaraq ərazidə bərpa işlərinə başlanılacaq".
