Xaçmaz şəhərinin İzmaylovka adlanan ərazisində, Alı Mustafayev küçəsində asfalt yolun ortasından keçən köhnə dəmir yolu xətti sakinlərin narazılığına səbəb olub.
Məsələ ilə bağlı Shimal.News-a danışan yerli sakinlərin sözlərinə görə, həmin dəmir yolu xətti uzun illərdir istifadə olunmur və hazırda yararsız vəziyyətdədir.
"Yolun ortasından keçən relslər asfalt örtüyünü zədələyib, bəzi hissələrdə çökmələr və çuxurlar yaranıb. 10 ildən çoxdur bu relslər istifadəsiz qalıb. Amma nə yığışdırılır, nə də yol bərpa olunur. Hər gün avtomobillərimiz zədələnir. Aidiyyəti qurumlar isə məsələyə reaksiya vermir", - deyə sakinlər bildiriblər.
Xaçmaz sakinləri aidiyyəti qurumların məsələyə müdaxilə etməsini, istifadəsiz dəmir yolu xəttinin sökülərək yolun əsaslı şəkildə təmir olunmasını tələb edirlər.
