Xaçmaz şəhərinin İsrafil Məmmədov, Şəhriyar və şəhid Davud Hacıyev küçələrinin sakinləri İlqar Məmmədov küçəsi boyunca 10 kV-luq elektrik xəttinin çəkilişinə etiraz edirlər.
Sakinlər Shimal.News-a müraciət edərək bildiriblər ki, elektrik xəttinin çəkilişi onların razılığı olmadan aparılıb və artıq küçə boyunca dəmir elektrik dirəkləri basdırılıb.
"2025-ci ilin sonunda məsələ ilə bağlı "Azərişıq" ASC-nin Xaçmaz Regional Enerji Təchizatı və Satışı İdarəsinə müraciət etdik. Əraziyə baxış keçirildi və dirəklərin çıxarılacağı barədə şifahi vəd verildi. Lakin buna baxmayaraq, dirəklər çıxarılmadı və işlər davam etdirildi", – deyə sakinlər bildiriblər.
Vətəndaşlar yüksək gərginlikli elektrik xətlərinin yerin altı ilə çəkilməsini tələb edirlər:
"Bu işlərin elektrik təchizatının yaxşılaşdırılması məqsədi ilə aparılmasına etirazımız yoxdur. Lakin yüksək gərginlikli elektrik xətləri yerüstü şəkildə çəkildikdə sakinlərin mülkiyyət hüquqları risk altına düşür. Elektrik təchizatını yaxşılaşdırmaq adı ilə burada yaşayan insanlar üçün daha böyük problem yaradılır".
Sakinlərin sözlərinə görə, xətt boyunca mühafizə zolağının formalaşması ərazidə yerləşən daşınmaz əmlakların hüquqi dövriyyəsini faktiki olaraq məhdudlaşdırır. Vətəndaşlar "Azərişıq" ASC-dən adıçəkilən küçələrdə yerüstü yüksək gərginlikli elektrik xətlərinin çəkilişinin dayandırılmasını xahiş edirlər.
